Novo recuncho na biblioteca para dar ás aos vosos afáns de construtores en potencia. Tres quilos de material, máis de dúas mil pezas coas que botar a voar a vosa imaxinación e creatividade. Agardamos por vós en Biblioromán.
Biblioteca do CEIP Terra Chá ··· Seivane, 35. 27841, Román, Vilalba (Lugo). ··· bibliotecaroman@gmail.com
29/02/24
Aquí xógase co (GA)LEGO
Novo recuncho na biblioteca para dar ás aos vosos afáns de construtores en potencia. Tres quilos de material, máis de dúas mil pezas coas que botar a voar a vosa imaxinación e creatividade. Agardamos por vós en Biblioromán.
26/02/24
A Maleta Viaxeira… (II)
… chega de novo ao colexio. Desta volta con 60 libros e 3 DVD relacionados coas Ciencias. Estarán á vosa disposición en Biblioromán durante dúas semanas.
Continúa lendo...
24/02/24
23 de febreiro. Día de Rosalía
Pasado o Entroido, chegou á escola e á súa biblioteca o Día de Rosalía. Foron diversas as actividades que en todas as aulas estivemos a desenvolver para nos achegar á vida e á obra desta precursora das nosas Letras. A nivel de centro escollemos traballar cos primeiros versos do poema número 16 de Cantares Gallegos, poema no que Rosalía fala do medo que lle produce un moucho na noite escura e de como ela é quen de conxurar este medo. Aproveitamos este traballo para abordar os nosos medos e foron xurdiron coplas ben fermosas e curiosas coma esta que propón Íker Castro:
Eu ben vin estar o lobo
enriba daquela rocha.
Eu xa non che teño medo,
eu voume cantar con Concha.
Tamén acudimos á música e á plástica para a conmemoración deste día, pintando mouchos e a efixie da escritora e gozando coa canción que sobre estes versos fixo Migallas, no seu marabilloso Pan de Millo.
Segue avanzando o curso paseniño e desta volta tocou este alto no camiño para lembrar a tan importante persoeira da nosas cultura, de quen outra das nosas poetas, Luz Fandiño, dixo:
"Non hai galego de lei que non sinta a Rosalía dentro da ialma..."
15/02/24
Tiramos os dados…
… e meteron nun apuro a estes alumnos de Primaria. Mañá leremos as marabillosas historias que saíron de cada un dos grupos.
07/02/24
Chegou o Entroido…
… a toda a escola e tamén, claro, a Biblioromán. Seguide os mandados do Meco, estade atentos ás nosas Redes para ver imaxes do desfile de hoxe e vide pola biblioteca aprender moitas cousas sobre esta festa tan divertida.
Subscribirse a:
Publicacións (Atom)