Apadriñamentos lectores

Sermos unha escola de aldea e pequena ás veces trae consigo atrancos e problemas, e normas inxustas que nos penalizan ou nos fan de menos; pero tamén implica outras moitas vantaxes e posibilidades. 

Son moitos os centros que organizan actividades formais (e xeniais) para poñer en contacto lectores noveis ou prelectores con lectores máis expertos de cursos superiores. En BiblioRomán non temos que organizar nada, soamente propiciar estes encontros facilitando un espazo axeitado e con libros (a biblio) e un tempo compartido (neste caso, o tempo de lecer) e a "maxia" flúe soa. É rara a semana en que na nosa biblioteca non se produce un apadriñamento lector.

E, por suposto, que vivan as voluntarias de BiblioRomán!

Continúa lendo...

Os mestres van a clase

É habitual que a xente miúda pense que os "maiores" xa o saben todo, que non teñen que aprender ou mesmo que perderon a curiosidade por facelo; e todo isto non é así. Hai un refrán que di: o vello está morrendo e está aprendendo e isto non podía ser máis certo. As persoas adultas tamén necesitamos seguir aprendendo cousas e revisar e poñer en solfa as que xa sabemos e para nós tamén é unha ledicia poder aprender e incorporar novas habilidades e/ou coñecementos.

Esta semana o claustro do CEIP Terra Chá recibiu unha formación sobre imprensión 3D para sermos quen de tirar todo o proveito posible deste tipo de recursos que en pouco tempo teremos tamén no noso centro.

Agradecemos ao CFR de Lugo e a Óscar Maceira un curso que nos vén de abrir unha morea de posibilidades para o traballo na aula.

Continúa lendo...

Quince días...

... estará entre nós a Maleta Viaxeira de Lectura e Diversidade. Bulide que logo pasan!

Continúa lendo...

Fabricando historias

O alumnado de terceiro e cuarto de Primaria tamén tirou proveito da Maleta Viaxeira de Lectura e Diversidade, achegándose á creación de historias tirando do libro Mi pequeña fábrica de cuentos de Bruno Gibert.

https://cuartoprimariaroman.wordpress.com/2024/04/18/historias-tolas-na-hora-de-ler/

Continúa lendo...

¡Oh!

Mirade que traballo máis chulo fixo o alumnado de 5º e 6º sobre o libro ¡Oh!, de Hervé Tullet, que chegou a nós na última maleta viaxeira que recibimos. Por iso en BiblioRoman non hai libros para os maiores e libros para os pequenos... simplemente hai libros.

Continúa lendo...

Unha nova Maleta Viaxeira (III)…

 … chegou a BiblioRomán: Lectura e Diversidade. Tedes quince días para enchouparvos cos seus coñecementos e gozar das súas lecturas e xogos.

Continúa lendo...

Extra, extra...!

... o último número de Chaira xa está á vosa disposición. 

Picade na seguinte ligazón para poder acceder á súa versión dixital. Agardamos que vos preste.

https://cuartoprimariaroman.files.wordpress.com/2024/03/chaira-semana-da-prensa-definitivo.pdf

Continúa lendo...

Día da poesía

fonte: https://www.juntadeandalucia.es/

A UNESCO adoptou o 21 de marzo como Día Mundial da Poesía co obxectivo de apoiar a diversidade lingüística a través da expresión poética e fomentar a visibilización daquelas linguas que se atopan en perigo. Este día conmemora unha das formas máis prezadas da expresión e identidade lingüística da humanidade. A poesía, practicada ao longo da historia en todas as culturas e en todos os continentes, fala da nosa humanidade común e dos nosos valores compartidos, transformando o poema máis simple nun poderoso catalizador do diálogo e a paz. [fonte: https://www.unesco.org/es/days/poetry]

Coa chegada deste día, un grupo de intrépidos alumnos do CEIP Terra Chá ousáronse a recitar fragmentos de distintos poemas recollidos en libros que temos en BiblioRomán. 

Bulide á sección 82-P e enchede as vosas almas de poesía, hoxe e todos os días, e é que –como dicía Gabriel Celaya- "a poesía é unha arma cargada de futuro".

E non vos esquezades de darlle unha apertiña a un carballo, que hoxe tamén é o Día da Árbore.

Continúa lendo...

Rosa Parks

A pasada semana, na Hora de Ler e grazas a un dos libros da Maleta Viaxeira, o alumnado de terceiro e cuarto achegouse á incrible historia desta muller.

Continúa lendo...

8 M

Entre a infindade de libros que contén a última Maleta Viaxeira que veu á escola, hai varios que nos foron especialmente útiles para o traballo da conmemoración do Día da Muller da pasada semana e que abofé que nos han valer para seguir afondando na incrible vida de moitas destas mulleres nos vindeiros días.

O marabilloso Pioneiras, de Anaír Rodríguez e Nuria Díaz deunos as chaves e a información para a elaboración dun mural na que participaron todas e todos: a xente miúda, debuxando; os maiores, escribindo.

Continúa lendo...

Falan de nosoutros... (V)

 ... e da nosa participación no programa "Coñece as túas institucións".

https://www.xunta.gal/documents/35297/662116/20240312PeFotoConeceAsTuasInstitucionsCEIPTerraCha_3.jpg?version=1.0&imagePreview=1

ACTUALIZADO 13/03/24, 22:24: https://galiciaxa.com/2024/03/tcxa/zonas-tcxa/vilalba-tcxa/259825/

Continúa lendo...

Pobo galego

Hoxe tivemos a inmensa sorte de nos achegar a tres institucións do pobo galego: dúas, no eido da política, e unha propia do ámbito cultural. Comezamos o día no Parlamento de Galicia, onde coñecemos a súa historia, o seu funcionamento e as súas funcións e puidemos vagar polos seus corredores ou sentar no hemiciclo como fan os deputados e deputadas, así como aventurarnos na súa biblioteca con máis de 50.000 volumes. Cara ao mediodía, fomos recibidos na Xunta de Galicia pola Directora xeral de Ordenación e Innovación Educativa, Judith Fernández, e alí puidemos saber de primeira man dos entertiños da nosa administración autonómica. E despois de repoñer forzas en Casa Agustín, diriximos os nosos pasos cara ao Museo do Pobo Galego, onde a través dun pequeno xogo fomos facéndonos concientes da importancia da historia, cultura e do inmenso patrimonio etnográfico do noso pobo.

Para quen non nos puido acompañar hoxe no noso paseo pola capital, velaiquí quedan estas fotos e dúas ligazóns para poder facer sendas visitas virtuais ao Parlamento de Galicia e ao Museo do Pobo Galego.

https://www.parlamentodegalicia.es/estaticos/visitavirtual/index.html

http://visitavirtual.museodopobo.gal/

Continúa lendo...

A sección de novidades…

… está que rebenta. Este ano o colexio fixo unha importante inversión para seguir anovando o catálogo da biblioteca. Novos volumes superchulos de consulta, narrativa, poesía ou banda deseñada están a agardar por vós en Biblioromán. Non o penses! Ven pola biblio!

Continúa lendo...

A mochila viaxeira de...

 ... Liam, de quinto de Infantil.

Continúa lendo...

A mochila viaxeira de... (04)

  ... Anxo, de segundo de Primaria.

Continúa lendo...

A mochila viaxeira de... (03)

 ... Lucas, de sexto de Primaria.

Lembrade que se, cando a Mochila chegue ás vosas casas, queredes participar nesta actividade, tedes toda a información para facelo na folliña plastificada que vai no medio dos libros. Animádevos a compartir as vosas lecturas!

Continúa lendo...

Sabías que...

... Chaira, o xornal da Escola, viu a luz nos anos 80. Nas vindeiras semanas tentaremos sacar un novo número. Polo de pronto, o alumnado de cuarto xa se botou a analizar prensa xeneralista e revisou números antigos do noso xornal para darlle forma a este proxecto.

https://cuartoprimariaroman.wordpress.com/2024/03/02/chaira-i/

Continúa lendo...

Aquí xógase co (GA)LEGO

Novo recuncho na biblioteca para dar ás aos vosos afáns de construtores en potencia. Tres quilos de material, máis de dúas mil pezas coas que botar a voar a vosa imaxinación e creatividade. Agardamos por vós en Biblioromán.

Continúa lendo...

A Maleta Viaxeira… (II)

… chega de novo ao colexio. Desta volta con 60 libros e 3 DVD relacionados coas Ciencias. Estarán á vosa disposición en Biblioromán durante dúas semanas.

Continúa lendo...

23 de febreiro. Día de Rosalía

Pasado o Entroido, chegou á escola e á súa biblioteca o Día de Rosalía. Foron diversas as actividades que en todas as aulas estivemos a desenvolver para nos achegar á vida e á obra desta precursora das nosas Letras. A nivel de centro escollemos traballar cos primeiros versos do poema número 16 de Cantares Gallegos, poema no que Rosalía fala do medo que lle produce un moucho na noite escura e de como ela é quen de conxurar este medo. Aproveitamos este traballo para abordar os nosos medos e foron xurdiron coplas ben fermosas e curiosas coma esta que propón Íker Castro:

Eu ben vin estar o lobo

enriba daquela rocha.

Eu xa non che teño medo,

eu voume cantar con Concha.

Tamén acudimos á música e á plástica para a conmemoración deste día, pintando mouchos e a efixie da escritora e gozando coa canción que sobre estes versos fixo Migallas, no seu marabilloso Pan de Millo.

Segue avanzando o curso paseniño e desta volta tocou este alto no camiño para lembrar a tan importante persoeira da nosas cultura, de quen outra das nosas poetas, Luz Fandiño, dixo: 

"Non hai galego de lei que non sinta a Rosalía dentro da ialma..."

Continúa lendo...

Tiramos os dados…

 … e meteron nun apuro a estes alumnos de Primaria. Mañá leremos as marabillosas historias que saíron de cada un dos grupos.

Continúa lendo...

Chegou o Entroido…

… a toda a escola e tamén, claro, a Biblioromán. Seguide os mandados do Meco, estade atentos ás nosas Redes para ver imaxes do desfile de hoxe e vide pola biblioteca aprender moitas cousas sobre esta festa tan divertida.

Continúa lendo...

A Maleta Viaxeira… (II)

… é, por definición, iso: unha maleta que viaxa. Hoxe tócalle deixar Román e iniciar unha nova singradura cara outro colexio no que atopar máis nenos que se ousen a furgar nos seus segredos, como unha crebeira raña na area na percura de tesouros.

Estade atentos que, se callar, en pouco tempo recibimos outra maleta cargada de diversión e coñecemento.

Continúa lendo...

30 de xaneiro: A Paz está nas nosas mans

 

Necesitamos paz: no mundo, nas nosas vidas... e tamén na escola. E a súa construción, moi especialmente da última delas, é cousa nosa.

Continúa lendo...

Alma e Lúa...

... vanse afacendo paseniño a nós. Se queredes aprender moitas máis cousas sobre este e outros animais domésticos, pasade por Biblioromán e visitade o andel que reúne todas as obras relacionadas co proxecto deste ano.

Continúa lendo...

Sementando coñecemento

Na mañá de hoxe, como noutras moitas mañás, foron varios os cursos que pasaron pola horta. O alumnado de Primaria rematou, ademais, un mural con fichas sobre algúns dos cultivos que temos plantados no invernadoiro. Agardamos que horta e mural sigan medrando vizosos.

 

Continúa lendo...

Día internacional da Educación

Os alumnos/as de cuarto de Primaria falaron hoxe sobre a importancia da Educación nas súas vidas e sobre a inxusta situación de moitas nenas e nenos no mundo que non poden ter acceso a ela.

https://cuartoprimariaroman.wordpress.com/2024/01/24/dia-internacional-da-educacion/

https://www.unesco.org/es/articles/la-unesco-dedica-el-dia-internacional-de-la-educacion-2024-combatir-la-incitacion-al-odio

Continúa lendo...

Guía de uso dos ordenadores

Xa tedes á vosa disposición en Biblioromán un equipo informático. Unha ferramenta para o coñecemento e o lecer. Velaiquí unha guía para o seu correcto uso.

Continúa lendo...